[SAJAK BATAK] Ombus-ombus Gabe Ngalian...

Tansiswo Siagian | Rabu, 08 Februari 2017 17:02:06

Partigatiga Ombus-ombus/Tansiswo Siagian
Partigatiga Ombus-ombus/Tansiswo Siagian

OMBUS OMBUS GABE NGALIAN

Ombus ombus nungnga lam ngali
Parombus ombus sai manghitiri
busisaon,
lomos
mintop lam sumurut panghirimonna
manghitir angka dot dot dugulna
dilanja tu dolok, dionjar dingkan toruan
"ombus ombus las kede"
"ombus ombus las kede"
"ombus ombus........las.....kede...."
hohom....... so maralus

hos ari mareak botari
lam tubu biarna
mago panghirimonna
nungnga marsurak siubeonna
hape.....
Ombus ombus nungnga lam ngali
lam so langku

Ombus ombus lam ngali
suda arang panggorgori
urmun ari so piga panuhor
ngali.....ngali angka hitir
par ombus ombus manghitir
matana medep marnida
Torop jolma haruar sian Indomaret
"manghanting SARI ROTI"
Ombus ombus lam ngali
Par ombus ombus ngalian
manderse
mandele so mandok dia

Di Siborongborong, Tarutung, Doloksanggul, Balige , Porsea, di sude Tano Batak
Partigatiga na bolon i, songon limatok
pasae mudar ni bangso
pasidinghon
Dolung dolung, Ombus ombus
manghaishon
Tipa tipa, Hansang Sihobuk,
Dangkek dangkek, daling daling
mago so dipadimun

Ombus ombus lam ngali
Ombus ombus......lam ngali
Ombus.....ombus.....lam.....ngali......
Hatadingan
Ditadingkon.......dihaishon
Hatadingan tung naung jumolo.

Tansiswo Siagian, 30-01-2017